Bitdefender-ийн нэрийг ашигласан луйварчдаас хэрхэн сэргийлэх вэ?

Bitdefender кибер аюулгүй байдлын салбарт нэр хүнд нэмэгдэх тусам түүний нэрийг ашиглан техникийн дэмжлэгийн ажилтан мэт өөрийгөө таниулж луйвар хийдэг этгээдүүд улам олширч байна. Хуурамч дэмжлэгийг хэрхэн таньж, түүнээс хэрхэн сэргийлэхийг доороос уншина уу.

1. ХУУРАМЧ ГЭНЭТИЙН ЦОНХ (POP-UP)

Та интернэтэд хайлт хийж байтал таны төхөөрөмж ноцтой халдвартай тул дэлгэц дээр гарч буй дугаараар антивирусын компанидаа яаралтай залгах ёстой гэсэн айдастай мессеж гэнэт гарч ирдэг.

2. ХҮСЭЭГҮЙ УТСААР ХОЛБОГДОХ

Хэн нэгэн танд гэнэт залгаж эсвэл дуут мессеж үлдээж, өөрийгөө таны хамгаалалтын программын дэмжлэгийн ажилтан гэж танилцуулаад, таны төхөөрөмжид ноцтой асуудал илэрсэн гэдэг. Тэд эхлээд таныг антивирусынхаа нэрийг хэлэхэд хүргэж, дараа нь өөрсдийгөө Bitdefender-д ажилладаг гэж мэдэгддэг.

3. ХУУРАМЧ ДЭМЖЛЭГИЙН ВЭБ ХУУДАС

Та Bitdefender-ийн тусламжийн төвийг интернэтээс хайж байтал жинхэнэ мэт харагдах сайт руу орж очно. Түүн дээр Bitdefender-ийн том лого, хуудасны талыг эзэлсэн утасны дугаар байдаг. Тэр дугаар руу залгавал (ихэвчлэн үнэгүй дугаар) утсаар ярьж буй хүн таны компьютер руу алсаас нэвтрэх эрх авахыг яаралтай оролдоно.

БАЙХГҮЙ АСУУДЛЫГ «ЗАСНА» ГЭЖ ЯАЖ ИЛҮҮ ТӨЛБӨР АВДАГ ВЭ

Хэрэв та цонхыг хаах, эсвэл утсаа таслах гэж оролдвол луйварчид таныг «маргааш өглөө хүртэл хүлээх», «төхөөрөмжөө унтраах» гэх мэт зүйл хийвэл засах боломжгүй хохирол учирна гэж айлгаж, оронд нь өөрсдийнх нь техникчид засаж өгөх ёстой гэж ятгадаг.

Тэд ихэвчлэн таныг эхлэгч хэрэглэгчид танил бус байдаг Windows-ийн функцүүд (Windows Event Viewer, Command Prompt гэх мэт) руу оруулдаг.

Дараа нь тэд танд бодит байдал дээр хор хөнөөлгүй, хортой программын халдвар эсвэл системийн алдааны нотолгоо огт биш алдааны бичлэгүүдийг хайлгуулна. Гэвч луйварч эдгээр бичлэгийг маш аюултай бөгөөд таны өгөгдлийг бүрмөсөн устгах болно гэж айлгадаг.

Дараа нь тэд «шийдэл»-ээ санал болгоно: асуудлыг «засах» гэж алсаас нэвтрэх эрхийг өгөх. Гэтэл бодит байдал дээр та алсаас нэвтрэх Trojan суулгаж байгаа юм.

«Шалгалт» хийх явцын аль нэг мөчид луйварч таныг компьютерийг засах гэж $200-$400 хооронд төлбөр төлөхөөр айлгана. Хамгийн муу санаатай луйварчид алсаас нэвтрэх эрхээ ашиглан жинхэнэ хортой программ суулгах, эсвэл таны хувийн баримт бичиг, банкны мэдээллийг хулгайлах ч тохиолдол бий. Хохирогч төлбөр төлөхөөс татгалзвал системийн файлуудыг устгадаг бүр ч муу тохиолдол ч байдаг.

ШИЙДЭЛ

Эдгээр луйварт бүү нэгд! Утсаа тас, эсвэл хөтчөө хаагаад л луйварт өртөхөөс сэргийлээрэй.

Хохирогч болохоос сэргийлэхийн тулд дараах зүйлсийг санаарай:

• Bitdefender-ийн ажилтнууд танай PC, Mac, ухаалаг утсанд аюулгүй байдлын асуудал байгаа гэж хэзээ ч гэнэт залгаж, эсвэл и-мэйл илгээдэггүй
• Хөтчөө ашиглаж байхад хуурамч алдааны мессеж гарвал, жинхэнэ алдаа болон халдвар хэзээ ч тодорхой дугаар руу залгахыг шаарддаггүй гэдгийг санаарай
• Ихэнх хуурамч анхааруулгад орфографийн болон дүрмийн алдаа, том үсэг, улаан өнгийн олон анхаарлын тэмдэг байдаг
• Хамгийн зөв арга бол манай Тусламжийн төв-өөс асуудлынхаа шийдлийг хайх, эсвэл Асуулт асуух-аар бидэнд бичих явдал юм. Bitdefender эсвэл bitdefender.mn-ийн нэрээр хэн нэгэн гэнэт залгаж, компьютерт тань алсаас нэвтрэх эрх хүсвэл бүү итгээрэй.

Хэрэв та өөрийн дансны мэдээллийг луйварчинд өгсөн, эсвэл хуурамч дэмжлэгт төлбөр төлсөн гэж бодож байвал банк болон санхүүгийн байгууллагадаа яаралтай мэдэгдэж, гүйлгээг буцаах хүсэлт гаргаарай.

Монголд бол банкиндаа яаралтай мэдэгдээд, цагдаагийн байгууллагад гомдол гаргана уу. Гадаадын луйварчинд хохирсон бол олон улсын луйврыг ECONSUMER.GOV дээр мэдээлж болно.